Պարգև Սարոյանը միացել է «Սիգմա լո գրուպ»-ին որպես գործընկեր 2023 թվականի հունվարին՝ բերելով իրավական ոլորտում ավելի քան մեկ տասնամյակի փորձ և միջազգային իրավունքի խորը գիտելիքներ:

Պարգևը 2013 թվականին «Վարչարարությամբ պատճառված վնասի հատուցումը» թեմայով պաշտպանել է թեկնածուական ատենախոսություն՝ ստանալով իրավական գիտությունների թեկնածուի կոչում։

Պարգև Սարոյանն իրավաբանության ոլորտում ունի ավելի քան տասը տարվա աշխատանքային փորձ, ինչպես նաև միջազգային աշխատանքի մեծ փորձառություն։ Վերջինս, ավելի քան 6 տարի աշխատելով Ֆինանսական համակարգի հաշտարարի գրասենյակում նախ որպես պահանջը քննող մասնագետ, այնուհետև՝ պահանջը քննող խմբի ղեկավար, զգալի ներդրում է ունեցել Հայաստանում վեճերի այլընտրանքային լուծման մեխանիզմների կայացման և զարգացման գործում։ Պարգևը նաև Հայաստանի Հանրապետության փաստաբանների պալատի անդամ է՝ մասնագիտացված քաղաքացիական և վարչական գործերով։

Պարգևը շուրջ 5 տարի զբաղվել է դասախոսական գործունեությամբ՝ Երևանի պետական համալսարանում դասավանդելով «Մունիցիպալ իրավունք» և «Վարչական իրավունք» առարկաները: Նա նաև շուրջ մեկ տասնյակ գիտական հոդվածների և աշխատությունների հեղինակ է, միջազգային հեղինակավոր մի շարք գիտաժողովների և սեմինարների մասնակից։

Պարգևն իր մեծ փորձի և ակադեմիական կրթության շնորհիվ անգնահատելի մասնագետ է «Սիգմա լո գրուպ»-ի համար։ Նրա փորձառությունը քաղաքացիական և վարչական իրավունքի ոլորտում, ինչպես նաև միջազգային փորձն ու հաճախորդների շահերի պաշտպանության հանձնառությունը ապահովում են մեր հաճախորդներին բարձրակարգ իրավաբանական ներկայացուցչություն և խորհրդատվություն։

Տաթև Մարտիրոսյանը 2021 թվականի մարտից «Սիգմա լո գրուպ»-ի թիմի արժեքավոր անդամ է:

Տաթևը Երևանի պետական համալսարանի շրջանավարտ է․ գերազանցությամբ ավարտել է Երևանի պետական համալսարանի իրավագիտության ֆակուլտետի բակալավրիատը և մագիստրատուրան՝ «Գործարարական իրավունք» մասնագիտացմամբ: Ներկայումս հանդիսանում է նույն ֆակուլտետի ասպիրանտ՝ քաղաքացիական իրավունքի մասնագիտացմամբ։

Տաթև Մարտիրոսյանը մասնագիտական պրակտիկա է անցել ՀՀ Սահմանադրական դատարանում, Բարձրագույն դատական խորհրդում, ՀՀ վճռաբեկ դատարանում, Ֆինանսական համակարգի հաշտարարի գրասենյակում: Ունի ավելի քան 3 տարվա մասնագիտական փորձ․ 2019 թվականից աշխատել է փաստաբանական գրասենյակում, այնուհետև` Պետական եկամուտների կոմիտեի հայցային աշխատանքների և դատական պաշտպանության բաժնում, որտեղ իրականացրել է ՀՀ պետական եկամուտների կոմիտեի շահերի պաշտպանությունը ՀՀ դատարաններում: 2020 դեկտեմբերի 6-ին ստացել է փաստաբանական գործունեության արտոնագիր և դարձել ՀՀ փաստաբանների պալատի անդամ:

Տաթևը հանդիսանում է գիտական մի շարք հոդվածների և աշխատանքների հեղինակ, որոնցից են` «Բարեխիղճ ձեռքբերողը ՀՀ քաղաքացիական օրենսդրությունում», «Հանրային ծառայության ոլորտի օրենսդրական կարգավորման հիմնախնդիրները, միասնականության ապահովման անհրաժեշտությունը», «Համաչափության սկզբունքը պատշաճ վարչարարության իրավունքի իրացման համատեքստում», «Վեճի լուծման արտադատական կարգը չպահպանելու հետևանքները քաղաքացիական դատավարությունում» վերտառությամբ գիտական հոդվածները, ինչպես նաև «Պատասխանողի շահերի պաշտպանության դատավարական միջոցները», «Գերիշխող դիրքի իրավական կարգավորումը ՀՀ-ում» վերտառությամբ աշխատանքները:

2024թ-ի տարեսկզբից Տաթևը նաև Երևանի պետական համալսարանի քաղաքացիական իրավունքի ամբիոնի դասախոս է: