Տաթև Մարտիրոսյանը Երևանի պետական համալսարանի շրջանավարտ է․ գերազանցությամբ ավարտել է Երևանի պետական համալսարանի իրավագիտության ֆակուլտետի բակալավրիատը և մագիստրատուրան՝ «Գործարարական իրավունք» մասնագիտացմամբ: Ներկայումս հանդիսանում է նույն ֆակուլտետի ասպիրանտ՝ քաղաքացիական իրավունքի մասնագիտացմամբ։


Տաթև Մարտիրոսյանը մասնագիտական պրակտիկա է անցել ՀՀ Սահմանադրական դատարանում, Բարձրագույն դատական խորհրդում, ՀՀ վճռաբեկ դատարանում, Ֆինանսական համակարգի հաշտարարի գրասենյակում: Ունի ավելի քան 3 տարվա մասնագիտական փորձ․ 2019 թվականից աշխատել է փաստաբանական գրասենյակում, այնուհետև` Պետական եկամուտների կոմիտեի հայցային աշխատանքների և դատական պաշտպանության բաժնում, որտեղ իրականացրել է ՀՀ պետական եկամուտների կոմիտեի շահերի պաշտպանությունը ՀՀ դատարաններում: 2020 դեկտեմբերի 6-ին ստացել է փաստաբանական գործունեության արտոնագիր և դարձել ՀՀ փաստաբանների պալատի անդամ: 2021 թվականի մարտից «Սիգմա լո գրուպ» փաստաբանական գրասենյակի թիմի անդամ է:

Տաթևը հանդիսանում է գիտական մի շարք հոդվածների և աշխատանքների հեղինակ, որոնցից են` «Բարեխիղճ ձեռքբերողը ՀՀ քաղաքացիական օրենսդրությունում», «Հանրային ծառայության ոլորտի օրենսդրական կարգավորման հիմնախնդիրները, միասնականության ապահովման անհրաժեշտությունը», «Համաչափության սկզբունքը պատշաճ վարչարարության իրավունքի իրացման համատեքստում», «Վեճի լուծման արտադատական կարգը չպահպանելու հետևանքները քաղաքացիական դատավարությունում» վերտառությամբ գիտական հոդվածները, ինչպես նաև «Պատասխանողի շահերի պաշտպանության դատավարական միջոցները», «Գերիշխող դիրքի իրավական կարգավորումը ՀՀ-ում» վերտառությամբ աշխատանքները:

Ռաֆիկ Գրիգորյանը ՀՀ փաստաբանների պալատի անդամ է, իրավաբանական գիտությունների թեկնածու, մինչև 2020 թվականը` Երևանի պետական համալսարանի դասախոս, հանդիսանում է ՄԱԿ-ի Զարգացման Ծրագրի (United Nations Development Programme), Եվրոպայի Խորհրդի (European Council) փորձագետ տարբեր ծրագրերով:

Ռաֆիկ Գրիգորյանը 2022 թվականին ձևավորված Սահմանադրական բարեփոխումների մասնագիտական հանձնաժողովի անդամ է։


Ռաֆիկ Գրիգորյանը գերազանցությամբ ավարտել է Երևանի պետական համալսարանի կողմից բակալավրիատը և մագիստրատուրան։ 2016 թվականին ստացել է գիտությունների թեկնածուի կոչում։


Ռաֆիկ Գրիգորյանը գիտական մոտ մեկ տասնյակ հոդվածների հեղինակ է․ հեղինակել է մենագրություն՝ «Պարտատոմսերի շրջանառության իրավական կարգավորումը Հայաստանի Հանրապետությունում» թեմայով, անցել է վերապատրաստումներ և մասնակցել է միջազգային մի շարք կոնֆերանսների Մեծ Բրիտանիայում, Գերմանիայում, Չեխիայում, Իսպանիայում, Կիպրոսում:

2019 թվականի հուլիսի 19-ին նշանակվել է ՀՀ արդարադատության նախարարի առաջին տեղակալ: Պաշտոնավարման ընթացքում համակարգել է Հայաստանի Հանրապետության դատական և իրավական բարեփոխումների 2019-2023 թվականների ռազմավարության կատարումը, նպաստել է մի շարք կարևոր նախաձեռնությունների իրականացմանը, մասնավորապես՝ «Դատական օրենսգիրք» սահմանադրական օրենքում 25.03.2020 թվականին ընդունված մեծածավալ փոփոխությունների, «Սնանկության մասին» ՀՀ օրենքում 12.12.2019թ. տեղի ունեցած փոփոխությունների և այլն: Մեծապես նպաստել է իր համակարգման ոլորտի և ընդհանրապես կառավարության մի շարք նախաձեռնությունների իրականացմանը տարբեր ոլորտներում, հանդիսացել աշխատանքային մի շարք խմբերի և հանձնաժողովների ղեկավար կամ անդամ:

Ռաֆիկ Գրիգորյանն աշխատել է որպես Ֆինանսական համակարգի հաշտարարի գրասենյակի գործ քննող մասնագետ, այնուհետև՝ գործ քննող խմբի ղեկավար՝ մեծապես նպաստելով ֆինանսական համակարգի ոլորտի իրավական բարելավմանը, իրավունքի զարգացմանը, ինչպես նաև սպառողների իրավունքների և օրինական շահերի պաշտպանությանը և վերականգնմանը, այդ թվում՝ հեղինակելով մի շարք կարևոր նախադեպային որոշումներ։ Հանդիսանում է նաև Երևանի պետական համալսարանի մագիստրոսական ծրագրի շրջանակներում դասավանդվող «Ապահովագրական իրավունք» դասընթացի հեղինակ։

2021 թվականի փետրվարին հիմնադրել է «Սիգմա լո գրուպ» փաստաբանական գրասենյակը, որի հիմնադրմամբ սկսվում է մի նոր փուլ` ակտիվ գործունեություն ծավալելու ինչպես մասնավոր, այնպես էլ հանրային իրավունքի բնագավառում՝ նպատակ ունենալով նպաստել Հայաստանի պետական-իրավական համակարգի կատարելագործմանը, տնտեսության իրավական կարգավորումների զարգացմանը. այս ամենը, բնականաբար, իրականացվելու է վստահորդների իրավունքների և շահերի գերակայության հրամայականից ելնելով:

Վրույր Հովհաննիսյանը «Սիգմա լո գրուպ» ՍՊԸ-ի կրտսեր իրավաբանն է։ Ավարտել է ԵՊՀ իրավագիտության ֆակուլտետը՝ այդ ընթացքում կամավոր պրակտիկա անցնելով նախ ՀՀ Վճռաբեկ դատարանի իրավաբանական փորձաքննությունների ծառայությունում, այնուհետև՝ «Սիգմա լո գրուպ» ՍՊԸ-ում։ «Սիգմա լո գրուպ» փաստաբանական գրասենյակում կամավոր պրակտիկա անցնելու և իրեն որպես պրոֆեսիոնալ մասնագետ դրսևորելու արդյունքում դարձել է ընկերության թիմի անդամ։


Ուսանողական տարիներին հասցրել է հեղինակել հետազոտական հետևյալ աշխատանքները՝ «Արժեթղթերը որպես քաղաքացիական իրավունքի օբյեկտ», «ֆինանսական առողջացման ծրագրի հետ կապված խնդիրներ», «Բաժնետոմսերի նախնական հրապարակային առաջարկ», ինչպես նաև դիպլոմային աշխատանք՝ «Ֆինանսական համակարգի հաշտարարի որոշումը չեղյալ ճանաչելու և ֆինանսական համակարգի հաշտարարի որոշման հարկադիր կատարման համար կատարողական թերթ տալու վերաբերյալ դիմումներով գործերի վարույթները» վերտառությամբ։

«Պետական կառավարման ձևերը» և Հայաստանի Հանրապետության Արբիտրների ասոցիացիայի կողմից կազմակերպված «Արբիտրաժ խաղ-մրցույթ» դատախաղերի մասնակից է։

Աշխատասեր է, պրոֆեսիոնալ և նպատակասլաց։